A Buach so prall wiar as ganze Lebn

„Es is a Buach so prall wiar as ganze Lebn“ schreibt da Heichele Uli in da TZ am Wochnend vom 15. aufn 16. Novemba 2014. „Das große bairische Gstanzlbuch“ vom Eichenseer Adi hert se noch Gaudi o, des moant sicha ned bloß da Uli. Aba a „noch Blädln, noch Bierdimpfe – is aba vui, vui mehra. […] Liabhom und streitn, Arbat und Freizeit, Lebn und Tod: Do is olles drin“. Oanig samma uns gwiß olle: „As Gstanzl hot zwar vui Tradition, is aba noch wia vor lewenedig.“ Und des ebn ned nua bei Hochzeitn oda in da Kirch, sondan a, bsondas am Land, an am ganz normaln Omd in da Wirtschaft. „Do hocka se d Leit zamm, oana nimmt a Quetschn oda a Gitarr, und na fangans as Singa o”. Da Eichenseer seibst sogt deshoib: „Des is a echte Mitmachkultur. D Leit entdeckn de Gemeinschaft wieda. Es gibt a Renaissance da Wirtshauskultur“. Und da Uli find: „mit seim Buach trogt er net wenig do dazua bei …“